Чӑваш Енри ҫӑмӑл атлетҫӑ Светлана Васильева допинг ӗҫнӗ тесе палӑртнӑ. Кун пирки www.kommersant.ru портал пӗлтерет.

Светлана Васильева Пӗтӗм тӗнчери ҫӑмӑл атлетика федерацийӗсен ассоциацийӗн антидопинг йӗркине пӑснӑ тесе палӑртнӑ. Ҫапла майпа ӑна 4 ҫуллӑха дисквалификациленӗ, 2011 ҫулхи юпан 18-мӗшӗнчен пуҫласа 2013 ҫулхи утӑн 14-мӗшӗчченхи тата 2016 ҫулхи ҫу уйӑхӗн 24-мӗшӗнчен пуҫласа 2016 ҫулхи раштавӑн 12-мӗшӗчченхи кӑтартӑвӗсене пӑрахӑҫланӑ.

Ҫав тапхӑрта вара Светлана Васильева Раҫҫей чемпионатӗнче – пӑхӑр, Европа Кубокӗнче пӑхӑр тата ылтӑн ҫӗнсе илнӗ. Эппин, вӗсем халӗ унӑн шутланмаҫҫӗ.

Лондонра ҫӑмӑл атлетика енӗпе тӗнче чемпионачӗ иртнӗ. Унта пирӗн ентеш Клавдия Афанасьева та лекнӗ.

Тӗнче шайӗнчи ӑмӑртӑва Раҫҫейри 19 спортсмена хутшӑнма ирӗк панӑ. Вӗсен йышӗнче - Клавдия Афанасьева та. Вӑл нейтраллӑ ялавпа ӑмӑртӑва тухнӑ.

Анчах пирӗн ентеш дистанцие вӗҫлеймен. 14-мӗш минутрах ӑна пӗрремӗш карточкӑна кӑтартнӑ. Виҫҫӗмӗш хутӗнче ӑна дистанцирен кӑларнӑ.

Ӑмӑртура Китайри Янг ҫӗнтернӗ. Иккӗмӗш вырӑна Мексикӑри Мария Гонзалез тивӗҫнӗ. Итали спортсменки Антонелла Палмисано финиша виҫҫӗмӗш ҫитнӗ.

Пӗтӗм тӗнчери официаллӑ тупӑшусенче пирӗн ҫӑмӑл атлетсем икӗ ҫула яхӑн ҫӗнтермен. Нумаях пулмасть вара Клавдия Афанасьева ҫӑмӑл атлетика енӗпе иртнӗ Европа ӑмӑртӑвӗнче мала тухнӑ. Вӑл 20 ҫухрӑмлӑ дистанцие хӑвӑрт утса ылтӑн медаль илнӗ.

Клавдия нейтраллӑ ялавпа тупӑшнӑ. Малтанах вӑл майӗпен утнӑ, кайран хӑвӑртлӑха ӳстернӗ. Юлашкинчен Испанири Мария Персран иртсе кайнӑ. Мария финиша иккӗмӗш ҫитнӗ.

Клавдия Польшӑри Быдгоще поселокӗнче иртнӗ ӑмӑртура дистанцие 1 сехет те 31 минут та 41 ҫеккунтра парӑнтарнӑ. Сӑмах май, 21 ҫулти пике Олимп резервӗсен Шупашкарти училищинче вӗренет.

Чӑваш Енре ҫуралнӑ спортсмена Спорт арбитраж сучӗ дисквалификациленӗ. Вӑл ӑмӑртусене 4 ҫул хутшӑнаймӗ.

Пӗтӗм Раҫҫейри ҫӑмӑл атлетика федерацийӗн сайчӗ пӗлтернӗ тӑрӑх, Петр Трофимова антидопинг йӗркине пӑснӑшӑн дисквалификациленӗ – 4 ҫуллӑха. Срока 2016 ҫулхи чӳк уйӑхӗн 3-мӗшӗнчен шутлама тытӑннӑ. Вӑл 2020 ҫулхи чӳкӗн 3-мӗшӗччен ӑмӑртусене хутшӑнаймӗ. 2009 ҫулхи ҫурла уйӑхӗн 13-мӗшӗнчен пуҫласа 2013 ҫулхи ҫу уйӑхӗн 18-мӗшӗччен ҫӗнсе илнӗ ӑнӑҫусене те пӑрахӑҫлӗҫ.

Сӑмах май, юлашки вӑхӑтра Петр Трофимов Мускав тата Чӑваш Ен чысне хӳтӗленӗ.

Ӗнер ҫӑмӑл атлетика енӗпе командӑсен хушшинче Раҫҫей чемпионачӗ старт илнӗ. Тӳрех палӑртар: пирӗн ентеш Анжелика Сидорова, Чӑваш Ен тата Мускав чысне хӳтӗлекенскер, ылтӑн медаль ҫӗнсе илнӗ.

Ӑмӑрту Сочири курорт хулара иртет. Унта 500 ытла ҫӑмӑл атлет хутшӑнать. Шӑчӑпа сикес енӗпе 13 спортменка вӑй виҫнӗ. Европа чемпионки, тӗнче чемпионачӗн призерӗ Анжелика Сидорова ӑмӑрту пӗтӗмлетӗвӗпе килӗшӳллӗн ҫӗнтерӳҫӗ пулса тӑнӑ. Вӑл ку сезона 4 метр та 60 сантиметр ҫӳллӗшне сиксе уҫнӑ.

Малтан Анжелика 4 метр та 50 сантиметра парӑнтарнӑ. Унтан 10 сантиметр ҫӳлерех сикме пултарнӑ. 4 метр 70 сантиметра виҫӗ хутчен сиксен те парӑнтарайман. Ҫапах Анжеликӑн кӑтартӑвӗ – чи лайӑххи.

Чире парӑнмасӑр ҫӗнтерӳ патне ӑнтӑлакансем

Паян Ҫӗнӗ Шупашкарта тӗрев-куҫав аппарачӗ аманнисен ҫӑмӑл атлетика енӗпе Раҫҫейри ӑмӑрту пуҫланнӑ. Ун пек ӑмӑрту Олимп резервӗн республикӑри 3-мӗш спорт шкулӗн манежӗнче кӑҫалхипе тӑваттӑмӗш хут иртет.

Виҫӗ кунлӑх ӑмӑртӑва ҫӗршывӑн 39 регионӗнчи 350-а яхӑн спортсмен пуҫтарӑннӑ. Республикӑри тӳре-шара вӗсене ӑнӑҫу суннӑ. Чире парӑнмасӑр ҫитӗнӳ патне талпӑнакансене хамӑр ҫӗршыври пӗрлештернӗ командин аслӑ тренерӗ Олегг Костюченко та хавхалантарнӑ. «Пӗтӗм тӗнчери паралимпиада комитечӗ пирӗн ҫӗршывӑн паралимпиада комитетне кӗртмест пулин те эпир шанӑҫа ҫухатмастпӑр, малаллах ӑнтӑлатпӑр», — тенӗ вӑл.

Ҫӗнӗ Шупашкарта иртекен ӑмӑртура мала тухнисем пӗтӗм тӗнчери ӑмӑртусене хутшӑнӗҫ. Спортсменсем 60, 400, 800, 1500, 3000 метра тупӑшӗҫ, техника дисциплинисенче хайсен пултарулӑхне кӑтартаҫҫӗ.

Ҫӗнӗ Шупашкарта ЧР Элтеперӗн Кубокне ҫӗнсе илессишӗн ҫӑмӑл атлетика енӗпе ӑмӑрту иртнӗ. Чӑваш Ен спортсменӗсем унта икӗ ылтӑн, пӗр кӗмӗл, виҫӗ пӑхӑр медальсем ҫӗнсе илнӗ.

Ӑмӑрту кӑрлач уйӑхӗн 14-мӗшӗнче пулнӑ. Тӗрлӗ регионтан килнӗ спортсменсем Олимп резервӗсен Ҫӗнӗ Шупашкарти 3-мӗш спорт шкулӗнче ӑмӑртнӑ. Михаил Игнатьев старт панӑ.

Кунашкал ӑмӑрту кӑҫалхипе 19-мӗш хут иртнӗ. 2013 ҫултанпа турнира Раҫҫей шайӗнче ирттереҫҫӗ. Пӗлтӗртенпе вара — Раҫҫей Гран-прин тапхӑрӗсенчен пӗри.

Анжелика Сидорова Элтепер Кубокне ҫӗнсе илнӗ. Вӑл Мускав тата Чӑваш Ен чысне хӳтӗленӗ. Ольга Муллинӑпа Ангелина Краснова иккӗмӗшпе виҫҫӗмӗш вырӑнсене йышӑннӑ.

Екатерина Ишова 3 пин метра чупса ҫӗнтернӗ. Кӗмӗл медале Анна Ильина тивӗҫнӗ. Владимир Попов, Диана Политова, Кирилл Григорьев пӑхӑр медальсем илнӗ.

Рио-де-Жанейрӑра Паралимпиада иртнӗ вӑхӑтра Мускавра спортӑн ҫак тӗсӗсемпе альтернативлӑ вӑйӑсем иртнӗ. Унта Чӑваш Енрен Елена Свиридова (Иванова) тата унӑн мӑшӑрӗ Владимир Свиридов хутшӑннӑ.

Владимир тӗнче рекордне ҫӗнетсе палӑрма пултарнӑ. Вӑл йӗтре тӗксе мала тухнӑ. Владимир Свиридов — ҫӑмӑл атлет, 2012 ҫулта Лондонра иртнӗ Паралимпиадӑра пӑхӑр медаль ҫӗнсе илнӗ. Вӑл Новочеркасск хулинчен, спортпа 12 ҫултах туслашнӑ. 2012 ҫулта Владимир Паралимп чемпионкине Елена Ивановӑна качча илнӗ. 2013 ҫулта вӗсен Владислав ывӑл ҫуралнӑ.

Ӑмӑртӑва пӗтӗмпе 266 спортсмен хутшӑннӑ. Вӗсем Раҫҫейри 55 регионтан килнӗ. Ҫакна Риори Паралимп вӑййисене каяйман спортсменсем валли йӗркеленӗ.

Дарья Спиридонова

Рио-де-Жанейрӑра Олимп вӑййисем пуҫланиччен вӑхӑт нумаях юлмарӗ. Допинг харкашӑвӗ спортсменсен кӑмӑлне пусарчӗ, ҫапах вӗсем ку ыйтӑва татса парасса юлашки кунччен шанчӗҫ.

Раҫҫей спортсменӗсене Олимпиадӑра хутшӑнма ирӗк панӑ. Анчах пурне те мар. Ҫӑмӑл атлетсем унта каяймӗҫ. Унччен допинг ӑша янипе ҫакланнӑ спортсменсем те Рио-де-Жанейрӑна вӗҫмӗҫ.

РФ спорт министрӗ Виталий Мутко каланӑ тӑрӑх, паянхи кун тӗлне Раҫҫейри 272 спортсмена Олимп вӑййисене хутшӑнма ирӗк панӑ.

Чӑваш Енрен унта тӑваттӑн кайӗҫ. Дарья Спиридонова гимнастка тӗп ӑмӑртусенче тупӑшӗ. Вячеслав Поляшовпа Евгения Шелгунова — резервра. Ирина Калентьева маунтинбайк енӗпе ӑмӑртӗ.

Чӑваш Енри 6 ҫӑмӑл атлет та Олимп вӑййисене кайма пултарнӑ. Анчах Раҫҫейри ҫӑмӑл атлетсемшӗн, Дарья Клишинӑсӑр пуҫне, ӑмӑрту пуҫланмасӑрах вӗҫленнӗ.

Спорт фронтӗнче черетлӗ антидопинг «вӑрҫи» пуҫланнӑ. Хальхинче Раҫҫей спортсменӗсене ФСБпа каварлашнӑшӑн айӑпланӑ.

Ҫак пӗтӗмлетӗвӗ Пӗтӗм тӗнчери антидопинг агентстви тунӑ. Вӗсен шухӑшӗпе, РФ Спорт министерстви, ФСБ тата спортсменсене хатӗрлекен центр Раҫҫей спортсменӗсене допинг ӑша янине хирӗҫлемен.

Раҫҫее Сочири антидопинг лабораторийӗ пробӑсене улӑштармалли мел шухӑшласа кӑларнӑшӑн айӑпланӑ. Ҫапла майпа юраман препаратсене ӑша янӑ спортсменсем Олимп вӑййисене хутшӑннӑ.

Пробӑсене улӑштарни пирки Григорий Родченков каласа кӑтартнӑ. Вӑл унччен Мускаври антидопинг лабораторине ертсе пынӑ. WADA доклачӗн текстӗнче унӑн хушаматне 105 хутчен асӑннӑ. Комисси ытти кӳнтеленсем каланине кӑтартман.